تاريخيميزدن آلينتى

عبدالرشيد قره باغي

چوخ احتمال كي سيزده اؤز تانيشلارينيز، دوستلارينيز، ياخينلارينيزدا افشار ، بيات ، شاملو ، بيگدلي سوي آدلارينا (فاميل) راست گلميسيز. بلكي ائله اونلارين معناسي و منشايي حاققيندا دا دوشونوب، فيكيرلشميسيز و يئنه ده چوخ احتمال كي دقيق و قانع ائديجي بير جواب الده ائتمه ميسيز. اوستده آدي گئدن فاميل لر، قديم تورك ائللري نين ان بؤيوگو و قدرتلي سي اولان اوغوز توركلري نين مختلف طايفالاري نين آدي دير.
اوغوزلار ايرانا و آذربايجانا گلديكدن سونرا، بورالاردا ساكينلشمگه باشلاديلار. آنجاق اونلارين بعضي طايفالاري نين بعضي حيصه لري ائله ياخين زامانلارا قدر ايستر مستقل صورتده، ايستر باشقا كؤچري ائللرين تركيبينده (ميثال اوچون شاهسون لر تركيبينده) كؤچري حياتلاريني داوام ائتديرميش و ائلات حالتيني ساخلاميشديلار. ائله بونا گؤره ده بو طايفالارين آدي اونلارا منسوب اولان عائله لرين فاميللرينده قوْرونموشدور.
رشيدالدينين جامع التواريخ اثرينده اوغوزلارين 24 قبيله و يا اؤزلري نين دئديگي كيمي بويونون آدي چكيلير. بايات (بيات)، آوشار (افشار)، بگ ديلي (بيگدلي) [شاملو، قره گؤزلو، گؤكلان و ... طايفالاري نين كؤكؤ بو بويا دايانير]، سالور، ييوا، باييندير، قايي، يازير، قينيق، ايگدير، آلقا ائولي، قارا ائولي، دؤگر، دودورقا، ياپارلي، قارقين، پچنق، چاوولدور، چپني، ائيمور، آلايونتلو، يوره گير، بوگدوز، قيزيق.

اوغوز سؤزو اوخ/اوق كلمه سيندن گلير. اوخ، توركجه ده هم ده قبيله معناسيندادير. قديم توركجه ده جمع علامتي اولان ز علاوه سي ايله اوقوز/اوغوز سؤزو يارانير. اوغوز سؤزو اولده تورك قبيله لري نين بيرليگيندن يارانميش اولان قبيله لر بيرليگي معناسيني وئريردي، آنجاق سونرالار بو معناسيني ايتيردي و بير تورك قبيله سي كيمي تانيندي.
بئله نظره گليركي اوغوز سؤزو، بيرينجي دفعه اورتا آسيا، خصوصيله ايسيق گؤل حوزه سي - بوگونكو قيرغيزستانداكي تورك طايفالاري بيرليگي اوچون استفاده اولونموش.
اوغوزلاري مختلف زامانلاردا و مختلف جغرافيادا، آلتي اوغوز، اوچ اوغوز، توقوز اوغوز (دوققوز اوغوز)، غوز، اوز كيمي آدلارلا گؤروروك.
اوغوزلار ميلادي 11-نجي عصرده بؤيوك ساييدا آذربايجانا گلميش و بورادا تدريجله باشقا طايفالارا نسبت اوستونلوك قازانميشديلار. البته بو طايفانين بو تاريخدن قاباق و سونراكي عصرلرده ده آذربايجانا كؤچلري اولموش، آنجاق 11-نجي عصر كؤچلري كيمي بؤيوك و حل ائديجي اولماميش.
اوغوزلارين قوردوغو و يا قورولوشوندا بيرينجي رولو اويناديغي بعضي دؤولتلر بئله سيرالانير: گؤي تورك امپراطورلوغو، سلجوقلو امپراطورلوغو، عثمانلي امپراطورلوغو، صفوي دؤولتي، افشار دؤولتي، قاجار دؤولتي، آغ قويونلو و قارا قويونلو دؤولتلري.
اوغوزلار مسلمانلاشديقدان سونرا، مسلمان اؤلكه لرينده توركمن آدي ايله تانينديلار.
گؤي تورك كتيبه لري (ميلادي 8-نجي عصرين اوّللري)، دده قورقود كيتابي (ميلادي
أون بيرينجى عصر) و كوراوغلو دستانلاري، اوغوزلارين اورتاق ادبياتي نين نمونه لري دير.